Summer Internship with IBM Daksh Business Process Service Ltd. – Nidhi Kapoor from Gitarattan International Business School

Daily Winner for: –  30th August 2013

Name of the intern: – Nidhi Kapoor

Institute: – Gitarattan International Business School

Organization interned with: – IBM Daksh Business Process Service Ltd.

TALAASH MEIN

Woh barsaat ke din the, July ki shuruaat thi. Rimjhim barsaat ho rahi thi aur prakriti mujhe ehsaas kara rahi thi ki duniya bohot farebi hai , dikhti kuchh hai aur hoti kuchh aur hai.

Aisi ek subah teesri beti ke roop mein mera janm hua. Khushi to shaayad hi kisi ko hui hogi. Sab ne kaha, “Phir beti!!” Meri Maa ki dasha kya hui hogi, main nahi jaanti. Dari-sehmi udaas madhyam vargiya parivaar ki bahu, jiska janm hi sasuraal ke taane khaane ke liye hi hua tha. Papa toh kuchh nahi bole, bas mere sir par pyaar se haath rakh diya aur mere pair chhoo liye. Isse dekh kar Maa ko bhi badi himmat mili aur socha ki main vyarth hi itni dukhi ho rahi hoon. Bhagwaan ne chaand si beti di hai, main isse bohot kaabil banaungi.

Par yeh kya, Maa ke ghar aate hi Papa ki mausi aa gayi aur apni behen, yaani meri Daadi ko salaah dene lagi, “Mere bade ladke ke teen bete hain. Itni sundar ladki tu usse dede , phoolon jaise rakhega. Shaam tak sab dekhne bhi aa gaye. Khus phus kar ke baate bhi hone lagi. Thak kar jab Maa raat ko mujhe sulaa rahi thi, Maa ke mann mein khyaal aaya, “Agar koi meri beti mujhse chheenega, toh main usse zinda nahi rehne dungi. Apne jeete ji, dusre ke haath nahi dungi.”

Maa ne darte hue Papa se baat ki. Papa ko pata chala to bohot gussa hue aur Daadi ko kaha, “Itna mat socho. Paal lunga.” Maa ko tasalli hui.

Samy beetne laga. Maa hum bachchon ko achhe se padhati thi aur unka sabse zyada dhyaan mujhpe rehta tha. Maa jee- jaan se padhati thi ki unke bachche kaabil ban sake. Main bhi padhai mein hoshiyaar thi aur class mein First aaya karti thi. Report-card jaakar Nana ji ko dikhaati thi, jo meri Maa ko aksar kaha karte the, ” ‘Unwanted child’ is God’s Gift. Ek din yeh ladki bohot kaabil banegi.”

Hoshiyaar hone ke kaaran meri school life mein koi best friend nahi ban paaya. Bas yahi kasak reh gayi dil mein. Aur Maa ko Daadi aur Bua taane deti rehti thi, “Saara din apni ladkiyon ko padhaati hai, collector banaana hai kya?”

Waqt beete pata bhi nahi chala mera college bhi khtam hone ko aa chala hai. Maine computers main mastery haasil kar rahi hun kyuki mera sapna hai ek badi company mein kaam karne ka. Pichhle saal ki baat hai, mere college main Summer – Training ke liye IT(Information Technology) ki IBM Daksh Business Process Service Ltd. company aayi. Company ne mujhe college se select kiya aur do mahinon ki Internship karne ka mauka diya. Maa Papa ki khushi ka thikaana nahi tha. Papa ne mujhe paise diye, aur Maa ko kaha, “Iske liye achhe achhe kapde banvaa de, joote-chapal sab le de. Meri beti office jaaegi.” Uss din maine apne Papa ki aankhon mein ek chamak dekhi, jaise koi ladai jeet li ho.

Main office ke liye jab pehle din jaa rahi thi, toh mere ghar ka maahaul aisa tha jaise koi tyauhaar ho. Sab log haathon mein cheezein pakda rahe the. Maa ne kaha bohot achhe se kaam karna, Papa ne kaha doodh peeti jaa, darna mat, phone karti rehna.

Sapna jaise poora hone hi jaa raha tha. Office pahunchi toh sab kuchh bohot achha tha, bohot hi jaldi bohot saare dost ban gaye, Boss bhi bohot khush the mere kaam se. 28 din beet gaye, aur main sochne lagi ki bas, do din baad mujhe mere jeevan ki pehli salary milegi. Chhoti–moti party to banti hai, zaroor dungi.

Dusre hi din jab subah office aayi toh pata chala ki Boss ne job badal li hai, aur do din baad woh Bangalore chale gaye. Naye boss aaye , aur ye kya! Boss bua ka beta tha! Maine socha ki mein office mein kisi ko nahi bataaungi, aur andar hi andar khush ho gayi ki ab to meri naukri pakki ho jaaegi. Aur ho sakta hai mujhe meri MCA puri hone ke baad bhi yahin naukri mil jaaye!

Agle din subah 11 baje peon aaya, aur usne mujhse kaha ki mujhe Boss bula rahe hai. Main jhat se chal padi. Andar cabin mein gayi toh unhone mujhse pucha, “Kaise ho? Yahaan kab se ho?” Maine kaha, “Theek hun, bas ek mahina hua hai.” Toh unhone kaha, “Dekho, main yahaan par tumhara Boss hoon, aur Tum yahaan Internship kar rahi ho. Yeh meri shaan ke khilaaf hai. Tum mujhe baksh do aur yahaan se chali jaao.” Aadhi salary kaat kar mere haath mein thama di.

Main jaise Aasmaan se zameen par gir gayi. Bina kuchh bole cabin se baahar aa gayi aur dobaara office nahi gayi. Doston ko bhi kuchh bol na saki. Rs. 5000 mile the, Maa Papa ko laakar de diye. Apne hi apno ke dushman bangaye. Maa ne Rs. 1000 maid ko de diye, jiski chaar betiyaan thi aur baki mujhe diye aur kaha, “Beta, udaas nhi hote. Safalta ki seedhi asafalta ke dandon par taiyaar hoti hai.”

Aur main aaj bhi uss party ke din ke intezaar mein hoon. Aaj bhi mujhe talaash hai uss naukri ki, jahaan meri kaabiliyat ko mahatv diya jaaye.

Was this interesting? If yes, please hit the ‘Like’ button below and help Nidhi become the winner of the month and win the prize (Rs. 5,000/-) that she truly deserves!

If you wish to participate, send in your entry here: http://www.internshala.com/your-internship-story